Dard-e-Ishq

Ae Dard-e-Ishq! Hai Guhr-e-Abdar Tu

Na-Mehramon Mein Dekh Na Ho Ashkara Tu!

Pinhan Teh-e-Niqab Teri Jalwagah Hai

Zahir Parast Mehfil-e-Nau Ki Nigah Hai

Ayi Nayi Hawa Chaman-e-Hast-o-Bood Mein

Ae Dard-e-Ishq! Ab Nahin Lazzat Namood Mein

Haan, Khud Numaeeyon Ki Tujhe Justujoo Na Ho

Minnat Pazeer Nala-e-Bulbul Ka Tu Na Ho!

Khali Sharab-e-Ishq Se Lale Ka Jam Ho

Pani Ki Boond Girya-e-Shabnam Ka Naam Ho

Pinhan Duroon-e-Sina Kahin Raaz Ho Tera

Ashak-e-Jigar Gudaz Na Ghammaz Ho Tera

Goya Zuban-e-Shayar-e-Rangeen Byan Na Ho

Awaz-e-Ne Mein Shikwa-e-Fursat Nihan Na Ho

Ye Dour Nukta Cheen Hai, Kahin Chup Ke Baith Reh

Jis Dil Mein Tu Makeen Hai, Wahin Chup Ke Bath Reh

Ghafil Hai Tujh Se Hairat-e-Ilm Afrida Dekh!

Joya Nahin Teri Nigah-e-Na Raseeda Dekh

Rehne De Justujoo Mein Khiyal-e-Buland Ko

Hairat Mein Chor Deedah-e-Hikmat Pasand Ko

Jis Ki Bahar Tu Ho Ye Aesa Chaman Nahin

Qabil Teri Namood Ke Ye Anjuman Nahin

Ye Anjuman Hai Kushta-e-Nazara-e-Majaz

Maqsad Teri Nigah Ka Khalwat Saraye Raaz

Har Dil Mai-e-Khiyal Ki Masti Se Choor Hai

Kuch Aur Aaj Kal Ke Kaleemon Ka Toor Hai