Gulab chehre pe muskurahat

Gulab chehre pe muskurahat
Chamakti aankhon mein shokh jazbe
Voh jab bhi college ki seidhiyon se
Saheliyon ko liye utarti 

To aise lagta tha jaise dil mein utar rahi ho 
Kuch is tayaqqun se baat karti thi jaise duniya 
Usi ki aankhon se dekhti ho 
Voh apne raste mein dil bichhati hui nigahon se hans ke kehti 

"Tumhare jaise bahut se laRkon se main yeh batain
Bahut se barson se sun rahi hoon! 
Main sahilon ki hawa hoon, 
neele samandaron ke liye bani hoon!"

Voh sahilon ki hawa si laRki
Jo rah chalti to aise lagta tha jaise dil mein utar rahi ho
Voh kal mili to is tarah thi
Chamakti aankhon mein shokh jazbe,
gulab chehre pe muskurahat

K jaise chandi pigal rahi ho
Magar jo boli to us ke lehje mein voh thakan thi k jaise sadion se dasht-e-zulmat mein chal rahi ho!

Roshni mizajon ka kiya ajab muqadder hai

Roshni mizajon ka kiya ajab muqadder hai 
Zindagi ke rastey mein bichney waley kanton ko 
Rah sey hataney mein 
Aik aik tinkey sey ashiyan bananey mein 

Khushboain bakerney mein 
Gulistan sajaney mein 
Umer kat detain hain 
Or apney hisey ke phool bant detain hain 

Kaisi kaisi khwaishon ko qatal kertey jatey hain 
Derguzer ke gulshan mein aber ban k rehtein hain 
Saber ke samunder mein kashtian chalatey hain 

Yeh nahien ke in ko roz-o-shab ki kawish ka 
Kuch sila nahien milta 
Merney wali ahon ka khoon baha nahien milta 
Zindagi ke daman mein jis qadar bhi khushian hain 

Sab hi hath atien hai 
Sab hi mil bhi jatien hain 
Waqt per nahien miltien 
Waqt per nahien atien 

Yani un ko mehnat ka ajer mil to jata hai 
Lakin is tarah jaisey 
Qerz ki koi reqm qist qist ho jaey 
Asal jo ibarat ho pass-e-nawisht ho jaey 

Fasl-e-gul k akhir mein phool un ke khiltey hain 
Jin ke sehn mein soorej dair sey nikaltey hain

jo utar ke ziinaa-e-shaam se terii chashm-e-Khush men samaa gaye

jo utar ke ziinaa-e-shaam se terii chashm-e-Khush me.n samaa gaye
vahii jalate bujhate se mahar-o-maah mere baam-o-dar ko sajaa gaye

ye ajiib khel hai ishq kaa mai.n ne aap dekhaa ye mojezaa
vo jo lafz mere gumaa.N me.n the vo terii zubaa.N par aa gaye

vo jo giit tum ne sunaa nahii.n merii umr bhar kaa riyaaz thaa
mere dard kii thii daastaa.N jise tum ha.Nsii me.n u.Daa gaye

vo charaaG-e-jaa.N kabhii jis kii lau na kisii havaa se niguu.N hu_ii
terii bevafaa_ii ke vaasavaa use chupake chupake bujhaa gaye

vo thaa chaa.Nd shaam-e-visaal kaa ke thaa ruup tere jamaal kaa
merii ruuh se merii aa.Nkh tak kisii raushanii me.n nahaa gaye

ye jo bandagaan-e-niyaaz hai ye tamaam hai vo lash_karii
jinhe.n zindagii ne aman na dii to tere huzuur me.n aa gaye

terii beruKhii ke dayaar me.n mai.n havaa ke saath havaa huaa
tere aa_iine kii talaash me.n mere Khvaab cheharaa ga.Nvaa gaye

tere vaasavaao.n ke fishar me.n teraa sharar-e-rang uja.D gayaa
merii Khvaahisho.n ke Gubaar me.n mere maah-o-saal-e-vafaa gaye

vo ajiib phuul se lafz the tere ho.nTh jin se mahak uThe
mere dasht-e-Khvaab me.n duur tak ko_ii baaG jaise lagaa gaye

merii umr se na simaT sake mere dil me.n itane savaal the
tere paas jitane javaab the terii ik nigaah me.n aa gaye

Agar Kabhi Meri Yaad Aaye
To Chaand Raaton Ki
Dilgeer Roshni Main
Kisi Sitaray Ko Dekh Laina

Agar Woh Nakhal Falak Say Urh Kar
Tumharay Kadmoon
Aagiray To Yeh Jaan Laina
Woh Istiaara Tha Meray Dil Kaa

Agar Naa Aaye?
Magar Yeh Mumkin Hi Kis
Tarha Hai Kay Tum Kisi
Par Nigah Daloo

Too Us Ki Deewaar e Jaan
Naa Tootay
Woh Apni Hasti Naa Bhool Jaye
Agar kabhi Meri Yaad Aaye

Garaiz Karti Hui Hawaoon
Ki Lehroon Pay Haath Rakhna
Main Khushbuoon Main
Tumhain Miloon Gaa

Mujhay Gulaab Ki Patioon
Main Talaash Karna
Main Aous Qatra Kay Aainay Main Tumhain Miloon Gaa
Agar Sitaaroon Main, Aous

Khushbhuoon Main
Naa Paoo Mujh Koo
To Apnay Kadmoon Main
Dekh Laina
Main Gird Hoti Musafitoon

Main Tumhain Miloon Gaa
kahin Pay Roshan Chiraagh
Dekh Loo To Jaan Laina
Kay Har Patangay Kay

Saath Main Bhi Sulag Chuka Hoon
Tum Apnay Haatoon Say In
Patangoon Ki Khaak Darya Main Daal Daina
Main Khaak Ban Kar

Sumandar Main Safar Karoon Gaa
]Kisi Naa Dekhay Huay
Jazeeray Par Ruk Kay
Tumhain Sadain Doon Gaa

Sumandaroon Kay Safar
Pay Nikloo
Too Is Jazeeray Pay Kabhi Utarna
Agar Kabhi Meri Yaad Aaye

Hawis aur Muhabbat

Kaha mainay janaN,
Yeh sub kuch baja hay,
Hamaray ta’luk k her rastay mein
BadaN sung-e-manzil ki surat kharra hay!!

Hawis aur Muhabbat ka lehja hay yaksaan,
Kay donu teraf say badan bolta hay,
Bazahir zamaN-o-MakaN kay safar mein
Badan Ibtida hay, Badan Intiha hay!
Mager iskay hutay………. sabhi kuch kay hutay,
Kahein beech mein wu ju ek fasla hay,

Woh Kia Hay???

Meri Jaan, daikhoo 
Yeh Mohoom sa fasla he hakeekat mein
Sari kahani ka asli sira hay
Badan ki hakeekat, muhabbat kay kisay ka sirf ek hissa hay,
aur is say agay

Muhabbat mein ju kuch hay usko samghna
Badan kay tasawur say he ma’wara hay
Yeh ek kay’fiyat hay
Jisay naam daina tu mumkin nahi
Samaghnay ki khatir bus itna samagh lo

Zameen ZadgaaN kay mukaddar ka jub faisla hu gaya
Tu apnay tahafuz, tashakhus ki khatir,
Her ek zaat ko ek ta’la milla tha
Wu makhsoos ta’la, ju ek khas number pay khulta hay lakin
Kisi aur number say milta nahi hay
Mujhay aur tujhay bhee yeh ta’lay milay tha

Mager farq itna hay kay donu kay khulnay kay number wuhi hein,
aur in numberoon pay hamaray siwa
teesra koi bhee quf’l khulta nahi 
teri aur meri baat kay dermiyaN
Bus yahi ferq hay

Hawis aur Muhabbat mein aye jan-e-jaan

Bus yahi ferq hay!!!

Mai hoon jis makaaN ki chhatt talay

Mai hoon jis makaaN ki chhatt talay
mera ghar nahi
tera naam darj hay jiss jagah
tera dar nahi

tujhay yaad hay!
tujhay yaad hay kisi shaam ham nay banaaya tha
kahin aik chotta sa rait ghar
ussi rait say, ussi rait par
ussi rat par

jo thi raah mai kisi moj kay
kabhi apnay honay kay dheyaan mai
kabhi mu’jizon kay gumaan mai

hamay ilm tha,
hamay ilm tha keh woh rait-ghar
jo thay muntazir kisi moj kay
unhay toot jaanay say roknay ka khayaal amr-e-mahaal hay
issi moj-o-raig kay khail say hi bahaal hay
woh talaazma,
wohi raabta, jissay maan-nay kay fishaar mai
rah-e-aagahi kay saraab bhi
sabhi khuwaab bhi
issi aik lamha-e-mukhtasir kay hisaar mai hay ghira huwa
khatt-e-raig bhi, kaff-e-aab bhi

pay yay daastaaN,
to thi tarjumaaN, kisi khail ki
ussi khail ki
jissay khailtay hamay aa liya kisi raat nay
ussi raat nay
jissay apnay khooN say jawaaN kiya
meray shoq nay, teray saath nay
kisi an-chuway say khayaal nay
kisi door hoti si baat nay

tujhay yaad hay, mujhay yaad hay,
woh jo baat ki barri dair tak
meray haath say, teray haath nay!

kahaan tha gumaaN, kissay thi khabar!
jo kaha tha shoq ki lehar nay
jo likha tha rait ki loh par
ussi aik shaam ka khail tha
ussi aik pal ka jamaal tha
ussi khail mai
ussi shaam ko

woh jo rait-ghar say bikhar gaey
woh jo aik pal mai ujarr gaey
meray khuwaab thay!
teray khuwaab thay!

chalaiN ham farz kartay haiN

yeh kaisa khayl hay taqdeer ki baynaam bazi ka
keh jo haaray, so haaray haiN
magar jo jeet jaatay haiN
unhay bhi ik naee uljhan ki daldal ghayr laiti hay
keh ikk mushkil kay baad ikk aur mushkil ghayr laiti hay

samajhnay kay liyay aaeyn,
chalaiN ham farz kartay haiN
kisi lamhe kisi ik shakhs ko paana hamari zindagi say bhi ziyada besh-qeemat tha
ham uss ki aarzu mai saari dunya bhool baithay thay
bas ussi ka naam laitay thay, ussi ko yaad kartay thay
ussi ki dhun mai jeetay thay ussi kay gham mai martay thay
to phir kuch yuN huwa ikk roz uss ko paa liya ham nay
ussay rangoN ki doli mai bitha kar ghar mai lay aaey
tassavur ki har ik khusbu gul-e-manzar mai lay aaey

kahani aagay chalti hay

to hota iss tarah hay – zindagi kay kaar-khanay mai
dinoN kay aanay jaanay mai
jahaN kay an-ginat kaamoN ka chakkar chalnay lagta hay
badan thakta hay
aankhain dayr tak baydaar rehnay say sulagti haiN
zubaan ik taajiraana aur musalsal jhoot
ki takraar say uktaanay lagti hay
magar majbur hoti hay
keh dunya ka dabao uss ko ruknay hi nahi daita
koi bay-kaar sa qissa woh phir dohraanay lagti hay
thakan aur neend ki milti haddoN mai, sard bistar par
sehar say raat tak ki bay-nateeja guftugu
yaad aanay lagti hay

to uss lamhe
woh umroN ki ryaazat ka samar, woh gohar-e-yakta
ussi shiknoN bharay bistar kay ik hissay mai hota hay
magar mehsoos hota hay
keh jaisay woh hazaroN meel ki dori pe rehta hay
issi doori kay sehra mai kaee raataiN bikharti haiN
kaee din faut hotay hain

to phir ik din
kisi baynaam say ehsaas ki aahaT
hamaray hast ki khaali gali mai goonjti hay
aur hamay baydaar karti hay, bataati hay
keh ham jis ghar mai rehtay haiN
wahan kuch khoobsurat khuwaab bhi abaad hotay thay

chalaiN ham farz kartay haiN
yeh sab kuch ik kahani hay,
magar kitni purani hay

kis say poochoon woh kiya

kis say poochoon woh kiya
shakhs hay jo meri
aarzu kay jharokoN mai thehray huway
saaray chehroN mai bikhra huwa hay magar
khud abhi apnay chehray mai utra nahi

kis say poochoon woh kiya
naam hay jo meri
dharrkanoN kay muqaddar mai marqoom hay
aur woh kiya ajnabi hay jo sadyon say meray khayaalon kay qaryay mai abaad hay
magar mera surat-shanasa nahi

kis ki awaaz hay
jo meri rooh mai naghma-parvaaz hay
kon batlaaey ga uss nagar ka patta
jis ki matti ki khusbu meray jism ke waastay darj hay
jis kay deevar-o-dar meri bay-khuwaab aankhon say maanoos hain
aur jis ko kabhi mai nay daikha nahi.

naarsaai meri, naarsaari meri
jiss ko paaya na tha uss ko khonay ka gham
meri khuwahish kay seenay ka naasoor hay
kis ko awaaz doon, kis ka maatam karoon!
woh abhi apnay chehray mai utra nahi
kis say poochoon mera mudda’a kon hay
naarsa kon hay

Yeh jo waqt he mery shehar par kayi mosmooN sy ruka hoya

Yeh jo waqt he mery shehar par kayi mosmooN sy ruka hoya
issy izn dy keh safar kary
issy khukm dy keh chal parhy, mery aasmaaN sy door ho
koyi chand chehra kushaa kary, koyi aaftaab zahoor ho

keh nawah-e-chashm-e-kheyaal mein woh jo khwaab thy, woh dhooaaN hoye
woh jo aag thi woh naheen rahi, jo yaqeen thy woh gumaaN hoye
koyi dhund he jissy dekhty meri aankh baraf si ho gayi
woh ibarat-e-sir-e-loh-e-dil, kissi rabt sy naheen aashna
keh jo roshni thi kitaab mein wohi harf harf si ho gayi

koyi gardbaad uthy kaheen, kissi zalzaly ki namood ho
yeh jo “hest” he mery chaar soo, koyi mohjaza keh yeh “bood” ho

meri aankh mein yeh jo raat he, meri umr si, issy taal dy
mery dasht-e-reeg-e-malaal ko kissi khushkhabri ka ghazzal dy
yeh falk pe jitny nujoom hain tery khukm ky hain yeh muntazir
woh jo subh-e-noo ka naqeeb ho meri samt us ko uchhaal dy

ay gham-e-yaar theher aaj ki shab

ay gham-e-yaar theher aaj ki shab
lag chuki teri sayahi dil per
aa chuki jo thi tabahi dil per
zard hay rang-e-nazar aaj ki shab
khaak ka dhair huway khuwaab nagar
aaj ki shab
ay gham-e-yaar theher aaj ki shab

kam-nazar daikh hawa ki aahatt
kis ki khusbhu mai basi aati hay
kon saa aks hay jis ki khaatir
aankh aaiyna bani jaati hay
kis tarah chaand achanak jhukk ker

sard shaakhon say lipat jaata hay
kis tarah rang-e-chaman
ik chehray mai simatt jaata hay
seal-e-amwaaj-e-tamanna kaisay
saahil-e-dil say palat jaata hay
aur kis tor say tay hota hay
lerrkharratay huway taaron ka safar

aaj ki shab

bay-hunar aaj ki shab
mujhay jee bhar kay ussay yaad to ker lainay day
daulat-e-dard hi sahi, jeet to bher lainay day

baadal kay aur beher kay rishtay ajeeb hain

baadal kay aur beher kay rishtay ajeeb hain
kaali ghatta kay dosh pay berfon ka darakht hay

jitnay zameen pay behtay hain derya sabhi ka rukh
ik beher-e-bay-kinaar ki manzil ki simt hay

khuwabon mai aik bheegi huwi khush-dili kay saath
milti hay aashna say koi ajnabi si moj

baadal bhanwar kay haath say laitay hain apna rizq
phir uss ko baantetay hain ajeeb bay-rukhi kay saath

jungle mai sehan-e-baagh mai shehron mai dasht mai
chashmon mai aabshaaron mai jheelon kay tasht mai

gaahay yeh os ban kay sanwertay hain berg berg
gaahay kisi ki aankh mai bhertay hain iss tarah

aansu ki ik boond mai dajla dikhai day
aur doosray hi pal mai jo daikho to door tak

raig-e-rawaan dard ka sehra dikhaaee day
baadal kay behar kay jitnay hain silsilay

mujh say bhi teri aankh kay rishtay wohi to hain

waqt say kon kahay yaar zara ahista

waqt say kon kahay yaar zara ahista
gar nahin vasal to yeh khuaab-e-rafaaqat hi zara dair rahay

waqfa-e-khuaab kay paaband hain jab tak ham hain
yeh jo toota to bikher jaaeyn gay saaray manzar

teergi-zaad ko moj hay fana ki taleem
hast aur naist kay maabain agar

khuwaab ka pal na rahay kuch na rahay
waqt say kon kahay yaar zara aahista…

yeh aur baat hy tujh sy gila nahiN karty

yeh aur baat hy, tujh sy gila nahi’N karty

jo zakhm tu ne diay hain, bhara nahi’N karty

hazaar jaal liay ghoomti phiry dunia

tery aseer, kisi k hua nahi’N karty

wafa ke aanch, sukhan ka tapaak do, inn ko

dilo’N ke chaak, rafoo sy sila nahi’N karty

jaha’N ho payar, ghalat fehmia’N to hoti hain

so, baat baat pe, yoon dil bura nahi’N karty

hamei’N hamari anaayn tabah kar dein ge

mukaalmy ka agar, silsila nahi’N karty

“jo hum pe guzri hy jana’N, wo tum pe bhi guzry”

jo dil bhi chahy to aesi dua nahi’N karty

har ik dua ke muqaddar mein kab hazoori hy!

tamaam ghunchy to AMJAD, khila nahi’N karty

Dil-e-be khabar zara hosla

Dil-e-be khabar, zara hosla..!

Koi aisa ghar bhi hai shehar mein, 

jahan har makeen ho mutma’in?

Koi aisa din bhi kahee’n pe hai, 

jisay khof-e-aamad-e-shab nahi?

Ye jo gard baad-e-zamaa’n hai, ye azal se hai, koi ab nahi..!

Dil-e-be khabar, zara hosla..!

Ye jo khaar hain tere paao’n mein, 

ye jo zakhm hain tere hath mein

Ye jo khwab phirtay hain dar-ba-dar, 

ye jo bat uljhi hai bat mein

Ye jo log bethay hain ja-ba-ja, kisi an-banay se dayaar mein

Sabhi aik jese hain sar-giraa’n, gham-e-zindagi k fishar mein

Ye saraab yunhi sada se hain, isi raigzaar-e-hayat mein

Ye jo raat hai tere chaar-su, nahi sirf teri hi ghaat mein

Dil-e-be khabar, zara hosla..! 

Tere saamnay wo kitab hai, jo bikhar gyi ho waraq waraq

Hmain apnay hissay k waqt mein, isay jorna hai sabaq sabaq

Hain ibaart’ain zara mukhtalif, magar aik asl-e-sawal hai

Jo samajh sako to ye zindagi, kisi haft-khwaa’n ki misaal hai 

Dil-e-be khabar zara hosla, nahi mustaqil koi marhala

Kya ajab keh kal ko yaqeen banay, 

ye jo muztarab sa khayal hai

Kisi roshni mein ho munqalib, kisi sarkhushi ka naqeeb ho

Ye jo shab numa si hai be-dili, ye jo zard-ru sa malal hai 

Dil-e-be khabar, zara hosla…! 

Labon Pe Phool Khiltay Hain Kisi Ke Naam Se Pahle

Labon Pe Phool Khiltay Hain Kisi Ke Naam Se Pahle
Diloan Ke Deep Jalte Hain Charagh-E Shaam Se Pahle

Kabhi Manzar Badalne Par Bhi Qissa Chal Nahin Pata
Kahani Khatam Hoti Hai Kabhi Anjaam Se Pahle

Yahi Taare Tumhaari Aankh Ki Chilman Mein Rehte The
Yahi Sooraj Nikalta Thaa Tumhare Baam Se Pahle

Hui Hai Shaam Jungle Main Parinde Laut-Te Honge
Ab In Ko Kis Tarah Rokain Nawaah-E-Daam Se Pahle

Ya Saare Rang Murdaa The Tumhaari Shakl Banne Tak
Ya Saare Harf Muhmal The Tumhaare Naam Se Pahle

Huaa Hai Wo Agar Munsif Tou Amjad IhtiyataN Ham
Sazaa Tasleem Karte Hain Kisi Ilzam Se Pahle

Bheerh Main Ik Ajanabii Kaa Samna Achcha Lagaa

Bheerh Main Ik Ajanabii Kaa Samna Achcha Lagaa
Sab Se Chup Kar Vo Kisii Kaa Dekha Achcha Laga

Surmai Ankhon Ke Niiche Phool Se Khilane Lage
Kahate Kahate Kuchh Kisii Kaa Sochna Achcha Lagaa

Baat To Kuchh Bhii Nahin Thii Lekin Us Kaa Ek Dam
Haath Ko Honthon Pe Rakh Kar Rokna Achcha Lagaa

Chaay Main Chinii Milaana Us Gharii Bhaya Bahut
Zer-E Lab Vo Muskurata Shukriyaa Achcha Lagaa

Dil Main Kitane Ahad Bandhe The Bhulane Ke Use
Vo Milaa To Sab Iraade Torana Achcha Lagaa

Beirada Lams Kii Vo Sansanii Pyarii Lagii
Kam Tavajjo Aankh Kaa Vo Dekhna Achcha Lagaa

Niim Shab Kii Khamushi Main Bhiigatii Sarakon Pe Kal
Terii Yaadon Ke Jaalo Main Ghumna Achcha Lagaa

Us Uduu-E-Jaan Ko ‘Amjad’ Main Buraa Kaise Kahoon
Jab Bhii Aayaa Saamane Vo Bevafaa Achcha Lagaa

Hasti ka aitbaar kiye bagair reh na jaye,

Hasti ka aitbaar kiye bagair reh na jaye,
Dunya hai yahan per jiye bin raha na jaye,

Kat’ti nahin yeh zindagi umeed ke bagher,
Yeh jaam woh hai jis ko piye bin raha na jaye,

Chahat ka zakhm dil ko tamasha na bana de,
Aesa hai chaak jis ko siye bin rahaa na jaye,

Dunya ke is afshaar mein hai us ki yaad yoon,
Aandhi ho tez aur diye bin raha na jaye,

Ik simt tera hukam hai, ik simt kayenaat,
Yeh bojh apne sir pe liye bin raha na jaye…

Hum nahin kehte hamari, teri dunya ho jaye,

Hum nahin kehte hamari, teri dunya ho jaye,
Itne rangon mein koi rang to apna ho jaye,

Ishq woh “turfa-balaa” hai ke kare jis ki talb,
Us ko maloom na ho, Sheher mein charcha ho jaye,

Do sitaron ko jo dekhoon teri ankhen ban jayen,
Chand ko dheyan mein laaon tera chehra ho jaye,

Har dora hai yeh nigehbaan khari hai kismat,
Kese mumkin hai ke har shasks ka socha, ho jaye,

Hum ko har bazm mein, Har haal mein sach kehna hai,
Sheher ka sheher khafaa hota hai, Acha ho jaye,

Ishq woh kaar-e-musalsal hai nahin jis ki akheer,
Us ki taufiq hai jis shakhs se jitna ho jaye,

Husn ki ankh woh tahsees talb hai amjad,
Bheerr ho charon taraf aur koi tanha ho jaye..

Kya kya hamare khawb they, jane kahan pe kho gaye,

Kya kya hamare khawb they, jane kahan pe kho gaye,
Tum bhi kisi ke sath ho, Hum bhi kisi ke ho gaye,

Jane woh kyon they, Kaun they? aaye they kis liye yahan,
Woh jo fashaar-e-waqt mein, Bojh sa aik ddho gaye,

Us ki nazar ne yoon kiya gard-e-malal-e-jaan ko saaf,
Abar baras ke jis tarah, Saarey chaman ko dho gaye,

Katne se aur barhti hai uthey huye sarun ki fassal,
Apne lahu se ahl-e-dil, Beej yeh kese bo gaye,

Jin ke bagher ik pal, Jeena bhi muhaal tha,
Shaklain bhi un ki bujh gayin, Naam bi un ke kho gaye,

Ankhon mein bhar ke rut jage, Raston ko de ke duriyan,
Amjad woh apne hamsafar, Kese mazey se so gaye…

Koi bhi aadmi poora nahin hai,

Koi bhi aadmi poora nahin hai,
Kahin aankhen, Kahin chehra nahin hai..