Chaman ka haal to ye hey ke khaak urrti hey

Chaman ka haal to ye hey ke khaak urrti hey 
kidhar sey ho ke bahaaroN ke kaarwaaN guzrey 

dayaar-e-yaar ka saara safar anokha tha 
qadam, qadam pe naya dey ke imtehaaN guzrey 

saba bhi aai to phooloN ke muNh jhulsa ke gai 
yahaaN sey abr bhi barsaa ke bijliyaaN guzrey 

kabhi to waar raqeeboN ke de gaey the mazaa 
kabhi to pyar azeezoN ke bhi giraaN guzrey 

aey dil sambhal ke kisi ko hisaab deyna hey 
ke zindagaani ke lamhey kahaN, kahaN guzrey