mere kamray k muqaddar men faqat tanhaee

maiz chup chaap, ghari band, kitaaben khaamosh
apnay kamray ki udaasi pay taras aata hai
mera kamra jo mere dil ki har ek dharkan ko
saal’ha saal se chup chaap ginay jaata hai

jehd-e-hasti ki kari dhoop se thak jaanay par
jis ki aaghosh ne bakh’sha hai mujhay maaN ka khuloos
jis ki khaamosh inaayat ki suhani yaaden
loriyan ban k mere dil men sama jaati hen

meri tanhai k ehsas ko zaayel karnay
jis ki deewaaren mere pass chali aati hen
ye kitaaben bhi mera saath nahi deetiN aaj
KATES ki nazm, ARASTU k hakeemaana qoal

sang-e-mar’mar ki imaarat ki tarah saakit hen
tu hi kuch baat kar aey mere dharaktay huay dil
tu hi ek mera sahara hai, mera moonis hai
tu hi is sard andhere men charaaghaN kar day
zindagi meri koi baat nahi sun sakti
mujko maloom hai kya beet chuki hai tujh par
mere chehray k sulagtay huay zakhmon ko bhi dekh
meri aankhon pay, meri fikr pay paabandi hai
men usay chaahon bhi to yaad nahi kar sakta

tu usay kho k machal sakta hai, ro sakta hai
aur men lut k bhi faryaad nahi kar sakta
isi aeenay ne dekhay hen hamaray jhagray
yehi zeena hai jahan men ne usay chooma tha

in qameezon men, in uljhay huay roomaaloN men
us k baalon ki mehek aaj bhi aasooda hai
jo kabhi meri thi, inkaar pay bhi meri thi
ab faqat bazm-e-tasavvur men nazar aati hai

raat bhar jaag k likhi hui tehreeroN se
ab bhi un aankhon ki tasveer ubhar aati hai
chaandni khil k nikhar aee hai darwaazay par
oas se bheegtay jaatay hen puraanay gamlay

subh kya jaanay kahan hoti hai, kab hoti hai
jaanay insaan ne kis waqt ye nemat paee
meri qismat men bas ek silsila-e-shaam-o-sahar
mere kamray k muqaddar men faqat tanhaee