raat kis waqt dhali

raat kis waqt dhali
kis ko maloom, huwi subha-e-tamanna kis waqt
raat kis waqt dhali
koi uss waqt na tha meray qareeb
jab sar-e-koo-e-habeeb
shoq ki baat chali

kiya khabar kaisay huwi dil ki kahani aakhir
raat kis waqt dhali
kiya khabar kon ufaq say ubhri
aankh kay taaq mai umeed ki baynaam kiran
yoon chali qaafla-e-harf-o-sada ki khushbu
jaisay mehka ho chaman
dil mai iss tarah kisi yaad nay karvat badli
jaisay dar jaaey hiran
saans mai yun kisi jazbay nay utthaeeN palkaiN
jaisay khilti hay kali
raat kis waqt dhali

raat kis wat dhali, kis ko khabar, doob gaya
kis ghaRi bheegti aankhoN mai sitaara gham ka
kis nay paaya hay kinaara gham ka

iss qadar os parri rukhsaaroN par
apnay chehray pay gulistaaN ka gumaN honay laga
dasht-e-dil seel-e-ravaaN honay laga
jab kabhi aankh utthi taaron per
chaandni maand huwi khuaab banay angaaray
shoq nay dard ki deevaaron per
naam kiya kiya na likhay aur mitaaey, piyaaray
aaina-khaana-e-khuwaab pe har ik lamha, hijr
soorat-e-sang laga
aa meray dost mujhe ang laga
mai mas-e-khaam hoon kar day mujhe sonay ki dali
raat kis waqt dhali

kitnay mausam thay jinhay taira patta mil na saka
kitni shaamain theen jinhain rang-e-hinna mil na saka
kitnay sajday thay jabeenon ki kameen-gaahon mai
jin ko ay dost tera qibla-e-paa mil na saka
mai bhi ik sajda-e-gum-raah ki soorat teray
naqsh-e-paa dhoond kay mayoos palat aaya hoon
mai woh mash’al hoon keh jo koocha-e-kooraaN mai jali
woh musaafir hoon jissay mil na saki teri gali
kiya khabar mujh ko huwi subha-e-tamanna kis waqt
raat kis waqt dhali