wuh jis ko jazboN ki har Laher nay

wuh jis ko jazboN ki har Laher nay,

theheR kay poocha kahaN nahiN hay

tou shehr-e-aqL kay baasioN ko,

yeh kyuN yaQeeN hay yahaN nahiN hay

tumhi ko dekha, tumhi ko socha,

tumhi ko chaaha, tumhaiN na payaa

muhabatoN kay Hazaar rastay,

koii bhii manziL jahaN nahiN hay

yeh kya ke tum nay kisi say puuchi,

humaray diL ki wuh sab kahani

keh jiss ka meh-ram siwa tumharay,

koi bhi humdam yahaN nahiN hay

hamaare dil ki in dharkanoN say,

kaho ke chup yeh rahaiN Khudara

yahaN pay gooNji haiN furqataiN hi,

milan ka naghma yahaN nahiN hay

ek umr guzri ke zard Rou hay,

hamaray jazboN ka garm jungal

khizaaN ka mausam hay kaesa mausam,

keh jiss pay ab tak khizaN nahiN hay

mohabatoN meiN yaqeeN ki hud say

 guzar kay ab maiN wahaN khaRi huuN

jahaN tumhaaray kisi qadam pay,

jafa ka hargiz gumaN nahiN hay