Us se main aksar kehta tha

Us se main aksar kehta tha,

Jana'n! Tum apni gardi badlo,

Tum par ye choti Charade bilkul suit nahi karti hai,

Dekho is kay pahiyye dekho,

Dekho dekho ye dash-board,

Kitna halka, kitna sasta.

Wese bhi sach pocho tu ye jo ungli main diamond hai,

Ye bhi is se mehenga hoga,

Isme aesi 2 , 2 kaare'n aa sakti hain,

Us se main aksar kehta tha,

Yaar! Tum apni gardi badlo.

Jaarday aanay walay hain aur heater kaam nahi karta hai,

Ye A/C bhi theek nahi hai tum ko loo bhi lag sakti hai,

Or ye dekho!

Itni achi composition aur bouseeda sound system,

Meri aqal se sab baahir hai.

Main tu public transpost par ajata hun,

Bachpan se iska aadi hun,

Lekin tum ye kese, kyun-kar itni choti gardi touba,

Meri aqal se sb bahir hai.

Us se main aksar kehta tha,

Yaar! Tum apni gardi badlo!

Ek din wo zach ho kar boli,

"Janay kiya hai kuch arsay sey,

Jab se tum jeevan main aye,

Choti gardi, choti cheezen,

2 kamro'n kay chotay ghar or chota aangan,

Choti moti hansti dunya, choti galiyan, choti basti,

Nannhay munnay mehkay khuwab,

Or kuch choti choti khushiyan,

Mujh ko ab achi lagti hain.

Jaanay kiya hai lekin sab kuch choti choti khuwahish ban kar,

Mujh me raks kia karta hai".

Main naadaan tha ye samjha wo meri gurbat main aasaani se reh legi,

Phir kuch urdtay lamhay aaye,

College kay 2 saal yun guzray jesay saans guzar jaati hai,

2 saalo'n main mosam badlay fashion or sey or hua aur sochon main tabdeeli aai.

Hum chotay se barday hue aur,

Jeenay ko pehlay se barh kar mushkil paaya,

Uski har choti khuwahish ka qad nikla aur,

Uski nannhi sochon nay bhi karwat badli,

Ek din usne apnay ghar ki sari choti choti cheezen,

Apnay maali kay chotay bachay ko dey dee'n.

Choti galiyan, chotay aangan, choti basti.

Ye sab tu wese bhi usko ek ghar main he mil sakta tha,

Usne choti gaardi badli,

Tark kiye wo saaray dost,

Sab rishtay or saaray saathi,

Jo chotay thay,

Or shayad un sab choto'n main,

Main sab se zyada chota tha...

Us se main khud he kehta tha,

Yar! Tum apni gaardi badlo.....