Fikar-e- Insan Per Teri Hasti Se Ye Roshan Huwa

Fikar-e- Insan Per Teri Hasti Se Ye Roshan Huwa

Hai Per-e-Muragh-e-Takhayul Ki Rasayi Ta Kuja

Tha Sarapa Rooh Tu, Bazm-e- Sukhan Pekar Tera

Zaib-E-Mehfil Bhi Raha, Mehfil Se Pinhan Bhi Raha

Deed Teri Aankh Ko Uss Husn Ki Manzoor Hai

Ban Ke Souz e-Zindagi Her Shay Mein Jo Mastoor Hai

Mehfil-e-Hasti Teri Barbat Se Hai Sarmayadar

Jis Tarah Naddi Ke Naghmon Se Sakoot-E-Kohsar

Tere Ferdous-e-Takhayul Se Hai Qudrat Ki Bahar

Teri Kisht-e-Fikar Se Ugte Hain Aalam Sabza War

Zindagi Muzmer Hai Teri Shaukhi-e-Tehreer Mein

Tab-E-Goyai Se Junbish Hai Lab-e-Tasveer Mein

Nutaq Ko So Naz Hain Tere Lab-e-Ejaz Per

Mehv-e-Hairat Hai Surayya Rifat-e- Parwaz Per

Shahid-e-Mazmoon Tassaduq Hai Tere Andaz Per

Khandazan Hai Guncha-e-Dilli Gul-e-Shiraz Per

 Aah! Tu Ujhari Huwi Dilli Mein Aaramida Hai

Gulshan-e-Weimar* Mein Tera Humnawa Khawabida Hai

* Weimar : Germani Ka Mashoor Shayar Goethe Iss Jagha Madfoon Hai

 Lutaf-e-Goyai Mein Teri Humsari Mumkin Nahin

Ho Takhayyul Ka Na Jab Tak Fikar-e-Kamil Hum Nasheen

 Haye! Ab Kya Ho Gyi Hindustan Ki Ser Zameen

Ah! Ae Nazara Aamoz-e-Nigah-e-Nukta Been

Gaisuay Urdu Abhi Mannat Pazeer-e-Shana Hai

Shama Ye Sodai-e-Dilsozi-e-Perwana Hai

 Ae Jahan Abad! Ae Gehwara-e-Ilam-o-Hunar

Hain Sarapa Nala-e-Khamosh Tere Baam-o-Der

Zarre Zarre Mein Tere Khabidah Hein Shamas-o-Qamar

Yun To Poshida Hain Teri Khak Mein Lakhon Gohar

Dafan Tujh Mein Koi Fakhar-e-Rozgar Aesa Bhi Hai?

Tujh Mein Pinhan Koi Moti Aab Dar Aesa Bhi Hai?