rooh jab wajad meiN aaey to gazal hoti hai

rooh jab wajad meiN aa’ey to gazal hoti hai
ya koi dil ko dukhaa’ey to gazal hoti hai

bheegti raat meiN jab gham ki fizaa’oon ka sukoot
dil meiN ik hashar uthaa’ey to gazal hoti hai

ishq ki aatish-e-khaamosh jab chupkay chupkay
aag seenay meiN lagaa’ey to gazal hoti hai

kabi mehfil meiN kabi goshaa-e-tanhai meiN
koi reh reh k rulaa’ey to gazal hote hai

gham-e-jaana hi se mukoof nahiN sheR-o-gaal
gam-e-duraan b sunaa’ey to gazal hoti hai