Lala'ay Sehra

Ye Gunbad-e-Meenai, Ye Alam-e-Tanhai

Mujh Ko To Darati Hai Iss Dasht Ki Pehnayi

Bhatka Huwa Raahi Main, Bhatka Huwa Raahi Tu

Manzil Hai Kahan Teri Ae Lala-e-Sehrayi!

Khali Hai Kaleemon Se Ye Koh-o-Qamar Warna

Tu Shoala-e-Seenayi, Mein Shoala-e-Seenayi!

Tu Shakh Se Kyun Phoota, Main Shakh Se Kyun Toota

Ek Jazba-e-Paidayi, Ek Lazzat-e-Yaktayi!

Ghawwas-e-Mohabbat Ka Allah Nigheban Ho

Har Qatra-e-Darya Mein Darya Ki Hai Gehrayi

Uss Mouj Ke Matam Mein Roti Hai Bhanwar Ki Ankh

Darya Se Uthi Lekin Sahil Se Na Takrayi

Hai Garmi-e-Adam Se Hungama-e-Alam Garam

Sooraj Bhi Tamashayi, Tare Bhi Tamashayi

Ae Bad-e-Biyani! Mujh Ko Bhi Anayat Ho

Khamoshi-o-Dil Souzi, Sar Masti-o-Raanayi!