Lenin (Khuda Ke Hazoor Mein)

Ae Anfus-o-Afaq Mein Paida Tere Ayaat

Haq Ye Hai Ke Hai Zinda-o-Paenda Teri Zaat

Main Kaise Samajhta Ke Tu Hai Ya Ke Nahin Hai

Har Dam Mutaghyyar The Khird Ke Nazariyat

Mehram Nahin Fitrat Ke Sarood-e-Azali Se

Beenaye Kawakib Ho Ke Dana’ay Nabataat

Aj Ankh Ne Dekha To Woh Alam Huwa Sabit

Main Jis Ko Samajhta Tha Kalisa Ke Khurafat

Hum Band-e-Shab-o-Roz Mein Jakre Huwe Bande

Tu Khaliq-e-Aasaar-o-Nigarindah’ay Aanat !

Ek Baat Agar Mujh Ko Ijazat Ho To Puchun

Hal Kar Na Sake Jis Ko Hakeemon Ke Maqalat

Jab Tak Mein Jiya Khaima-e-Aflak Ke Neeche

Kante Ki Tarah Dil Mein Khatakti Rahi Ye Baat

Guftar Ke Asloob Pe Qaboo Nahin Rehta

Jab Rooh Ke Andar Mutaltum Hon Khayalat

Woh Kon Sa Adam Hai Ke Tu Jis Ka Maabood

Woh Adam-e-Khaki Ke Jo Hai Zair-e-Samawat?

Mashriq Ke Khudawand Saifedan-e-Farangi

Maghrib Ke Khudawand Darakhshandah Filzaat

Yourap Mein Bohat Roshani-e-Ilm-o-Hunar Hai

Haq Ye Hai Ke Be-Chashma’ay Haiwan Hai Ye Zulmat

Raanayi-e-Tameer Mein, Ronaq Mein, Safa Mein

Girjon Se Kahin Barh Ke Hain Bankon Ki Amarat

Zahir Mein Tajarat Hai, Haqiqat Mein Juwa Hai

Sood Aik Ka Lakhon Ke Liye Marg-e-Mafajat

Ye Ilm, Ye Hikmat, Ye Tadabur, Ye Hukumat

Peete Hain Lahoo, Dete Hain Taleem-e-Masawat

Bekari-o-Uryani-o-Maikhawari-o-Iflaas

Kya Kaam Hain Farangi Madniyat Ke Fatuhaat

Woh Qoum Ke Faizan-e-Samawi Se Ho Mehroom

Had Uss Ke Kamalaat Ki Hai Barq-o-Bukharaat

Hai Dil Ke Liye Mout Machinon Ki Hukumat

Ehsas-e-Marawwat Ko Kuchal Dete Hain Aalaat

Asaar To Kuch Kuch Nazar Ate Hain Ke Akhir

Tadbeer Ko Taqdeer Ke Shatar Ne Kiya Maat

Maikhane Ki Bunyad Mein Aya Hai Tazalzul

Baithe Hain Issi Fikar Mein Peeran-e-Kharabat

Chehron Pe Jo Surkhi Nazar Ati Hai Sar-e-Shaam

Ya Ghazah Hai Ya Saghir-o-Meena Ki Karamat

Tu Qadir-o-Adil Hai Magar Tere Jahan Mein

Hain Talakh Bohat Banda’ay Mazdoor Ke Auqat

Kab Doobe Ga Sarmaya Prasti Ka Safina?

Dunya Hai Teri Muntazir-e-Roz-e-Makafat !