ab jo sochain bhi to khof aata hay

ab jo sochain bhi to khof aata hay
kis qadar khuwaab thay jo khuwaab rahay
kis qadar naqsh thay jo naqsh-e-sar-e-aab rahay
kis qadar log thay jo
dil ki dehleez pe dastak ki tarah rehtay thay
aur nayaab rahay!

kis qadar rang thay jo
band kalyoN kay kham-o-pech mai chakraatay rahay
apnay honay ki tab-o-taab mai lehraatay rahay
par kabhi aap say baahir na huway
phool kay haath pe zaahir na huway!
dil kay girdaab mai tootay huway patton ki tarah
hama-tan-raqs rahay
khoon kay surkh mai baynaam sitaaron ki tarah
aks-dar-aks rahay!

kaisay aadarsh thay jin kay saaey
sansanaatay huway teeron ki tarah chaltay thay
hast or neest kay mabeen ajab rishta tha
rooh ki aag bharrakti to badan jaltay thay!

woh shab-o-roz thay kiya,
jab kisi khuwaahish-e-baidaar ki tughyaani mai
waqt ki qaid say lamhaat nikal jaatay thay
khoon mai jab bhi sulagta tha iraada koi
aahni toq, tamaazat say pighal jaatay thay!

aankh kay dasht mai ab laakh aalao deHkain
rooh ki baraf pighalti hi nahi
ab woh aadarsh kabhi
waqt ki oat say jhaankain bhi to yoon jhaanktay hain
jis tarah tooTeta taara koi
aik lamhay kay liyay koond kay chhup jaata hay
kis qadar khuaab thay jo khuaab rahay
ab jo sochain bhi to khof aata hay