Na sawaal sood-o-ziyaaN ka hey

Na sawaal sood-o-ziyaaN ka hey, wuh kiya jo mujhko mila nahiN
merey humsafar tu yaqeen kar , mujhey tujhsey koii gila nahiN

merii jaaN na koi fikr kar, mujhey manziloN ki talab nahiN
hoN wuh reh-guzar jo ujaaR hey, kabhi jis pe koi chalaa nahiN

kabhii raastey kabhi manzileiN, kabhi dooriyaaN kabhi qurbateiN
heiN raaah-e-hayaat k silsiley, teri iss meiN koi khataa nahiN

k haraa rahey tera nakhl-e-jaaN, terey har qadam pe bahaar ho
yehii wird hey mera raat din,merey lab pe koi dua nahiN

heiN terey karam ki hi baarisheiN sadaa raheeN merey haal pe
karuuN tujhsey koi gilaa kabhi, ye muhabbatoN ka silaa nahiN