ali ali ke siwa kya

ali ali ke siwa kya meri hayaat me hai
namaaze ishqe ali mere waajibaat me hai

pule seraat se kaise na wo subuk guzre
sha'oore naade ali jis ki baat baat me hai

hussain aaye to tu bhi diye jalaane lagi
hawaa charaag bujhaana teri sifaat me hai

fidak ki asl pe jo shakhs daalta hai naqaab
sharike jurm fidak ki wo vaardaat me hai

ye kaun kehta hai dunya se khaali haath gaya
ye dekho daamane shabbir mere haath me hai

khuda banaa liye peida kahi rasool huwe
hussain laao agar koyi qaaenaat me hai

sila behisht hai rehan azmi jiska
ye manqabat meri aisi nigaar shaat me hai