Tifal-e-Sheer Khwar

Main Ne Chaqu Tujh Se Cheena Hai To Chillata Hai Tu

Mehrban Hun Main, Mujhe Na-Mehrban Samjha Hai Tu

Phir Para Roye Ga Ae Nauwarad-e-Aqleem-e-Ghum

Chubh Na Jaye Dekhna! Bareek Hai Nauk-e-Qalam

Ah! Kyun Dukh Dene Wali Shay Se Tujh Ko Pyar Hai

Khail Iss Kaghaz Ke Tukre Se, Ye Be-Azaar Hai

Gaind Hai Teri Kahan, Cheeni Ki Billi Hai Kidhar?

Woh Zara Sa Janwar Toota Huwa Hai Jis Ka Sar

Tera Aaeena Tha Azad-e-Ghubar-e-Arzu

Ankh Khulte Hi Chamak Utha Sharar-e-Arzu

Hath Ki Junbish Mein, Tarz-e-Deed Mein Poshida Hai

Teri Soorat Arzu Bhi Teri Nauzaeeda Hai

Zindagaani Hai Teri Azad-e-Qaid-e-Imtiaz

Teri Ankhon Par Haweda Hai Magar Qudrat Ka Raaz

Jab Kisi Shay Par Bigar Kar Mujh Se, Chillata Hai Tu

Kya Tamasha Hai Raddi Kaghaz Se Mann Jata Hai Tu

Aah! Iss Adat Mein Hum Ahang Hun Main Bhi Tera

Tu Talawwan Ashna, Main Bhi Talawwan Ashna

Arzi Lazzat Ka Shaidai Hun, Chillata Hun Main

Jald Aa Jata Hai Gussa, Jald Mann Jata Hun Main

Meri Ankhon Ki Lubha Leta Hai Husn-e-Zahiri

Kam Nahin Kuch Teri Nadani Se Nadani Meri

Teri Soorat-Gah Giryan-Gah Khandan Main Bhi Hun

Dekhne Ko Naujawan Hun, Tifl-e-Nadan Main Bhi Hun