nahi nigaah mein manzil to justujuu hii sahii

nahi nigaah mein manzil to justujuu hii sahii
nahi visaal mayassar to aarazuu hii sahii

na tan mein Khuun faraaham na ashk aankhon mein
namaaz-e-shauq to vaajib hai be-vazuu hii sahii

kisii tarah to jame bazm maikade vaalo
nahin jo baadaa-o-saaGar to haa-o-huu hii sahii

gar intazaar kaThin hai to jab talak ai dil
kisii ke vaada-e-fardaa kii guftaguu hii sahii

dayaar-e-Gair mein maharam agar nahin koi
tau ‘Faiz’ zikr-e-vatan apane ruu-ba-ruu hi sahi