ye mussafateiN raah-e-ishq meiN

ye mussafateiN , raah-e-ishq meiN
kon shahr-e-jaaN ki nazar karey
kissey shouq tanhaa safar karey
karey shahr-e-furqat ki arzoo
kon dasht-e-hijraaN ko ghar karey

in raastoN par chalaa kabhii
merey saath ban k wuh hum-safar
jissey samjhaa shareek-e-reh-guzar
sar-e-raah wuh kisi moR par
badley gaa manzil , thii kyaa khabar

mujhey faasiloN ki fikr nahi
merey ru-ba-ru merey khaab heiN
wuh jo manzileiN heiN dhuwaaN dhuwaaN
ye jo be-nishaaN sey heiN raastey
merey waastey ye azaab heiN

ab uss k aur merey darmiyaaN
haail anaa k mizaaj heiN

ussey phir sey milney ki chaah meiN
ab aur chalna muhaal hey
kisey tera itnaa khayaal hey?
kahaaN kon tera hey muntizar?
merey dil ka mujhsey sawaal hey…

meri chaahtoN ka ye haal hey
jo merey junooN ka arooj thaa
wuhi hosloN ka zawaal hey
jo merey liye tha khushi kabhii
wuh ab.. baais-e-malaal hey

meri be-bassi bhi kamaal hey
nahi uss sey milney ki justujoo
na hi waapsii ka khayaal hey…!