Wo pass tha to mujhay manzilain dikhata tha

Wo pass tha to mujhay manzilain dikhata tha
Juda hoa to wo khud rastay say bhataka tha

Main chal raha hoon mager rastay nahi simattay
Yay hadsa bhi meri zindgi main hona tha

Wo bheer thi k nazer say nazer na milti thi
Hujoom – e – shehr main her admi akela tha

Taras raha hai ab ek boond ki enayat ko
Wo admi jo samandr ki teh main rehta tha

Ghalat keh is kay yahan aag bhi na jalti thi
Ghalat keh sara dhooa’n meray gher say nikla tha

Chalo kay gir hi gai hai apnay boojh say deewar
Chalo keh sirf isi baat ka to jhagra tha